Поранешниот американски тенисер, Патрик Мекинро, смета дека Новак Ѓоковиќ и во наредните неколку години ќе победува на грен слем турнирите.
Ѓоковиќ во февруари годинава по деветти пат ја освои титулата на Австралија Опен со што дојде до бројката од 18 грен слем трофеи во кариерата или само два помалку од најтрофејните Рожер Федерер и Рафаел Надал.
Следниот голем турнир е Ролан Гарос, а подготовките на земјените терени засега се неуспешни за српскиот тенисер бидејќи не стигна до самата завршница на мастерсот во Монте Карло како и на турнирот во Белград.
Но, Патрик Мекинро верува дека дека Ѓоковиќ и понатаму ќе освојува трофеи на најголемите турнири.
– Доколку Новак остане здрав и биде гладен за титули, а се чини дека така и ќе биде, тогаш ќе биде во состојба да освојува една до две грен слем титули годишно и тоа наредните две-три години – изјави Мекинро.

Според Мекинро, конкуренцијата сè уште не е подготвена да ја предизвика големата тениска тројка, Ѓоковиќ, Надал и Федерер.
– Медведев во финалето на Австралија Опен немаше план за игра и не испрати никаков сигнал дека е подготвен да го плати физичкиот цех кој е неопходен за да можете да се носите со Ѓоковиќ. На крајот, секогаш се сведува на такви детали, а тоа е неопходно за да ги победите тие великани. Не само што големата тениска тројка е дизички посилна туку се и подобри со рекетот – додава Мекинро.