Ако цената за килограм грозје падне под ланската, берба нема да има, родот ќе остане на нивите, порачаа денеска претставниците од регионалното здружение „Напредни лозари” на средбата со министерот за земјоделство Трајан Димковски во Моклиште, Кавадаречко.

Министерот Димковски ги слушна нивните барања за цената, но и проблемите со извозот кои, како што изјави, очекува брзо да се надминат. Димковски рече дека целокупното произведено грозје од оваа реколта ќе биде откупено.

-Се согласуваме со барањето на лозарите за постигнување цена за килограм грозје на минатогодишно ниво. Разговаравме и за проблемите околу извозот на винско грозје. Очекувам брзо да се надминат, истакна Димковски.

– Сега приоритет ни е реколтата 2020, Министерството, како и изминатите три години, е отворено за соработка со лозарите, рече министерот и потсети и дека се што било договарано, е исполнето.