Билетите за трката 24 часа Ле Ман распродадедни седум месеци пред стартот
Идната година ќе биде одржано јубилејното 100. издание на познатата авто-трка на издржливост, а организаторот очекува над 260.000 гледачи
Билетите за јубилејното 100. издание на познатата авто-трка на издржливост 24 часа Ле Ман се распродадени, објавија организаторите. Стартот е за седум месеци, продажбата на билетите започна на 21 октомври, а беа распродадени за два месеци.
Натпреварот е закажан на 10-11 јуни. Лани организаторите пријавија дека трката ја гледале нешто повеќе од 244.000 гледачи. Рекордот на гледачи беше поставен во 2015 година, кога трката привлече 263.500 луѓе.
Но организаторите очекуваат ова јубилејно издание на познатата трка да биде повеќе посетено и да го собори рекордот од 2015 година.
Сепак, остануваат уште непродадени билети за слободните тренинзи, во средата, четвртокот и петокот пред трката.
Победникот од оваа извонредна трка ќе ја помине линијата на целта во 16 часот во недела на 11 јуни! Дали Порше, Ферари, Тојота, Пежо, Гликенхаус или Кадилак ќе го подигне уникатниот трофеј произведен од „Ле Моне де Пари“?