В петок, 29 мај, со почеток од 20.30 часот во Сараево, најдобрата македонска фудбалска репрезентација ќе игра пријателски натпревар против селекцијата на Босна и Херцеговина.

За Босанците тест пред нивниот настап на Мундијалот, а за избраниците на селекторот Гоце Седлоски подготовка пред натпреварите од Лигата на нации што ќе стартува во септември.

Босанскиот селектор Сергеј Барбарез на прес-конференција ги сподели очекувањата пред утрешниот контролен дуел со Македонија:

– Македонија е многу сериозен противник со нов селектор и ова е секако важен натпревар за нив, тие дефинитивно ќе се обидат да го добијат мечот, исто како и ние. Не може да напаѓате или да се браните цели 90 минути. Дефинитивно ќе ги координираме и нападот и одбраната. Овој натпревар е можност да видиме сè, да им дадеме на сите барем половина натпревар, и тоа е идеја. Да се ​​одморат некои играчи кои имаат мали проблеми, а да не се преземаат ризици. Тоа е сериозен натпревар, и нема сомнение за тоа – се зборовите на Барбарез.

Ова ќе биде шести пријателски натпревар меѓу БиХ и Македонија, трипати ремизиравме (1:1, 4:4, 2:2), имаме една победа од 1:0 на 18 февруари 2004 година, а Босанците славеа со истиот резултат на 29 март 2000 година.