Машката кошаркарска репрезентација на Македонија „Под 18“ години отпатува за Хрватска, каде од 24 јули до 2 август ќе настапи на Европското првенство од Дивизијата „Б“. На шампионатот, кој ќе се одржи во Риека и Опатија, ќе учествуваат 22 национални селекции, а трите најдобропласирани репрезентации ќе обезбедат место во елитната Дивизија „А“.

Македонските јуниори ќе се натпреваруваат во групата „Д“, заедно со селекциите на Грузија, Шведска, Унгарија и Босна и Херцеговина. Првиот предизвик за избраниците на селекторот Миодраг Тодоровиќ ќе биде токму дуелот со Грузија. Натпреварите ќе се играат во спортската сала „Марино Цветковиќ“ во Опатија и спортскиот центар „Замет“ во Риека.

Иако подготовките беа одбележани со неколку повреди, селекторот Миодраг Тодоровиќ истакнува дека атмосферата во тимот е одлична и дека фокусот е целосно насочен кон првиот натпревар.

– Атмосферата во репрезентацијата е одлична, на највисоко ниво. За жал, имавме неколку повреди кои ги сменија плановите во текот на подготовките, но тоа е составен дел од спортот. Имавме доволно време да ги анализираме противниците, а целиот наш фокус е насочен кон првиот натпревар против Грузија. Одиме меч по меч и на секој натпревар ќе играме на победа. Тоа е наша обврска кога го носиме дресот со државниот грб. Ќе се бориме секоја секунда за Македонија, затоа што амбициите секогаш мора да бидат највисоки кога се игра за националниот тим – изјави Тодоровиќ пред заминувањето за Хрватска.

НАТПРЕВАРУВАЧКИ ГРУПИ

ГРУПА А: Хрватска, Швајцарија, Црна Гора, Норвешка, Романија
ГРУПА Б: Полска, Исланд, Чешка, Украина, Португалија. Азербејџан
ГРУПА Ц: Белгија, Велика Британија, Финска, Ирска, Холандија, Кипар
ГРУПА Д: Шведска, БиХ, МАКЕДОНИЈА, Грузија, Унгарија

РАСПОРЕД НА НАТПРЕВАРИТЕ НА МАКЕДОНИЈА

ГРУПА Д

24.ЈУЛИ (ПЕТОК)

20.30: Грузија – МАКЕДОНИЈА

25.ЈУЛИ (САБОТА)

18.00: МАКЕДОНИЈА – БиХ

26.ЈУЛИ (НЕДЕЛА)

10.30: Унгарија – МАКЕДОНИЈА

27.ЈУЛИ (ПОНЕДЕЛНИК) – СЛОБОДЕН ДЕН

28.ЈУЛИ (ВТОРНИК)

МАКЕДОНИЈА – слободна

29.ЈУЛИ (СРЕДА)

10.30: МАКЕДОНИЈА– Шведска