Американскиот претседател Доналд Трамп сака претседателот на ФИФА, Џани Инфантино, да биде следниот генерален секретар на Обединетите нации, пренесува „New York Post“, повикувајќи се на извори блиски до Белата куќа.

Инфантино (56) во изминатиот период изгради блиски односи со Трамп преку организацијата на Светското првенство, а според истите извори, претседателот на ФИФА вложил големи напори да го вклучи американскиот претседател во најважните моменти од турнирот. Во декември минатата година дури му ја врачи и првата мировна награда на ФИФА.

Извор близок до Трамп тврди дека американскиот претседател смета дека Инфантино „ужива почит низ целиот свет и има посебна способност да ги обединува луѓето“.

Новиот генерален секретар на Обединетите нации ќе биде избран годинава како наследник на Португалецот Антонио Гутереш, чиј мандат завршува на крајот од декември.

Trump wants to nominate FIFA boss Gianni Infantino for UN secretary-general following World Cuphttps://t.co/wHp0hYzU60 pic.twitter.com/99dIrDrUSC

— New York Post (@nypost) July 21, 2026

За да ја добие функцијата, Инфантино најпрво би требало да обезбеди поддршка од 15-члениот Совет за безбедност, каде петте постојани членки имаат право на вето, а потоа да биде потврден и од Генералното собрание.

Засега не е познато дали Инфантино воопшто е заинтересиран за оваа позиција, ниту дали Трамп разговарал со него на оваа тема.

Според „New York Post“, Трамп смета дека постои добра можност бидејќи актуелната конкуренција не е доволно силна. Меѓу најпознатите кандидати се поранешната претседателка на Чиле, Мишел Бачелет, која би можела да наиде на отпор од САД, како и генералниот директор на Меѓународната агенција за атомска енергија, Аргентинецот Рафаел Гроси, околу кого Велика Британија би можела да има резерви поради спорот за Фолкландските Острови.

Доколку Инфантино биде избран, тоа би ја нарушило досегашната неформална практика следниот генерален секретар да доаѓа од Латинска Америка или Карибите. Сепак, повеќе извори сметаат дека ова правило не е обврзувачко и дека претседателот на ФИФА би можел да добие поддршка од повеќе држави.

Паоло Замполи, специјален пратеник на Трамп за глобални партнерства, изјави дека „само претседателот Трамп можел да дојде до толку генијална идеја“.

Според него, Инфантино би внел нова енергија во Обединетите нации и би можел преку спортот да создава нови мостови меѓу државите, како и да ги инспирира младите и сиромашните ширум светот.

„Постојат одредени сличности меѓу функцијата претседател на ФИФА и генерален секретар на ОН. Во Обединетите нации треба да се координираат 193 земји членки, додека ФИФА има повеќе од 200 членки. Резултатите на Џани покажуваат дека знае како да управува со толку голема организација“, изјави Замполи.

Тој откри дека минатиот викенд бил заедно со Инфантино на финалето на Светското првенство во Њу Џерси, но дека воопшто не разговарале за можноста тој да стане генерален секретар на ОН.

Трамп претходно јавно ги критикуваше Обединетите нации поради, според него, недоволната активност во решавањето на големите светски конфликти. Минатата година формираше и американски Одбор за мир, што предизвика шпекулации дека сака да создаде алтернатива на ОН, иако тој ги демантираше тие тврдења и изјави дека сака организацијата да има поактивна улога.

По враќањето во Белата куќа, Трамп значително ги намали американските финансиски придонеси кон Обединетите нации и ги повлече САД од неколку нејзини агенции, меѓу кои Светската здравствена организација (СЗО), УНЕСКО и Советот за човекови права.

Изборот на Инфантино би можел да придонесе за подобрување на односите меѓу администрацијата на Трамп и Обединетите нации.

Сепак, доколку ја прифати функцијата, Инфантино би морал да се помири со значително помала плата. Како претседател на ФИФА заработува околу шест милиони долари годишно, додека годишната плата на генералниот секретар на ОН изнесува околу 418.000 долари.

Во меѓувреме, Инфантино веќе ја најави својата кандидатура за нов мандат на чело на ФИФА. Изборите ќе се одржат во март следната година.

Неговата позиција беше разнишана по контроверзиите за време на Светското првенство, кога Трамп интервенираше за да биде поништена суспензијата на американскиот репрезентативец Фоларин Балогун пред натпреварот против Белгија. Одлуката предизвика жестоки реакции кај европските федерации, иако поразот на САД од Белгија ја намали тензијата.

Меѓу најгласните критичари на Инфантино е и поранешниот претседател на ФИФА, Сеп Блатер, кој повторно побара негово заминување од функцијата.

Само седум фудбалери ги освоија сите најголеми големи трофеи