Само нешто повеќе од една недела по елиминацијата во четвртфиналето на Светското првенство од Шпанија, Белгиската фудбалска федерација се раздели со селекторот Руди Гарсија (62). Неговиот договор не беше продолжен, а наследникот веќе е избран.

Според Фабрицио Романо, Федерацијата постигнала договор со поранешниот холандски репрезентативец Марк ван Бомел, а остануваат да се договорат само неколку технички детали пред официјалната потврда.

Двете страни се согласиле околу времетраењето на договорот, па Ван Бомел ќе ја води Белгија до Европското првенство во 2028 година. Финансиските услови се договорени, а веќе се разговарало и за составот на стручниот штаб.

🚨🇧🇪 BREAKING: Mark van Bommel as new Belgium head coach, here we go!

Deal in place until June 2028 for van Bommel, ready to replace Rudi Garcia.

Signatures to follow but all agreed, as @PJCalcoen reported. pic.twitter.com/DeB9q4HkWf

— Fabrizio Romano (@FabrizioRomano) July 22, 2026

Ван Бомел бил прв избор

Уште од првиот ден по разделбата со Гарсија, Ван Бомел бил главниот кандидат за селекторската функција. Во Белгиската федерација го ценат како тактички одлично поткован тренер, но и како човек кој знае успешно да работи со играчите.

Единствената потенцијална пречка е тоа што Ван Бомел не зборува француски јазик, што би можело да предизвика незадоволство во франкофонскиот дел од Белгија. Сепак, Холанѓанецот веќе најавил дека ќе работи на усовршување на францускиот, а тоа не би требало да биде проблем бидејќи веќе зборува германски, англиски, италијански и шпански јазик. Воедно, ниту Руди Гарсија не зборуваше холандски, а тоа никогаш не претставуваше сериозен проблем.

По работата како помошник-тренер во младинските категории и националните селекции, Ван Бомел во 2017 година стана тренер на младинците на ПСВ. Само една година подоцна беше промовиран во првиот тим, каде што ја водеше екипата на 75 натпревари.

Во првата сезона за малку ја загуби шампионската титула од Ајакс, а во втората беше отпуштен поради слабите резултати, иако просечно освојуваше 1,95 бодови по натпревар.

Најголемиот тренерски успех го оствари со Антверпен, каде што ја освои историската двојна круна – шампионската титула и националниот куп. Претходно имаше кратка епизода и во германски Волфсбург.

Откако го напушти Антверпен во 2024 година, Ван Бомел беше без ангажман. Тоа била негова свесна одлука, бидејќи сакал да го прифати само вистинскиот проект.

Доколку сè се одвива според планот, Марк ван Бомел ќе дебитира како селектор на Белгија во квалификациите, а репрезентацијата ќе ја предводи и на Европското првенство во 2028 година.

Доналд Трамп сака Џани Инфантино да стане нов генерален секретар на Обединетите нации