Австралијанец преживеал напад на крокодил со тоа што му го гризнал очниот капак
Австралиски фармер вели дека е среќен што е жив откако се одбранил од крокодил каснувајќи го, објави „Би-би-си“.
Колин Деверо бил во болница еден месец откако бил каснат од слатководен крокодил од 3,2 метри. Тој за „Еј-би-си њуз“ (ABC News) опишал како преживеал гризејќи го очниот капак на животното.
Неговата битка за живот и смрт се случила минатиот месец во притоката на реката Финис во која влегол за да фати риба. Во тој момент крокодилот му скокнал на ногата и го затресол како кукла, изјавил Деверо.
“Беше многу непријатна ситуација. Случајно му го фатив очниот капак со забите. Беше многу тешко, како да гризев кожа. Почнав да го кинам, а тој ме пушти”, рекол фармерот кој успеал да стигне до автомобилот.
Со крпа и јаже го запрел крварењето од ногата, а брат му го пренел во болницата оддалечена 130 километри.
„Да ме гризеше за друг дел од телото, сѐ ќе беше поинаку“, изјавил Деваро.
Според локалната власт, крокодилите се заштитен вид и како туристичка атракција се важни за тој дел од Австралија.