Во прегратките на заштитното лице на францускиот нов бран, актерот Жан-Пол Белмондо, кој почина во понеделникот, се најдоа едни од најубавите актерки, како Кетрин Денев, Софија Лорен, Клаудија Кардинале и Франсоас Дорлек. Освен во заедничките филмови, вечниот заводник Бебел љубеше убави актерки и во реалниот живот, како Урсула Андрес и Лаура Антонели, а иако кружеа гласини за романсите со многу познати дами, овие жени го обележаа неговиот живот.

Жан – Пол Белмондо, кој почина на 6 септември на 89-годишна возраст, одамна е секс-симбол на француската кинематографија, а својот статус го докажа со многуте убавици што поминаа низ неговиот живот.

Жените го обожаваа Бебел

Првата со која се ожени беше Елоди Константин. Се венчаа во 1952 година и во бракот добија три деца; Патриција (1954) која трагично почина во 1994 година, Флоренс (1960) и Пола (1963). Бебел се раздели со Елоди во 1965 година, а официјално се разведоа во 1968 година.

Во 1965 година, партнерка на Белмондо во филмот „Човекот од Хонг Конг“ му беше поранешната манекенка, швајцарската актерка Урсула Андрес. Хемијата помеѓу двата секс-симболи беше премногу силна, па иако двајцата беа во брак, влегоа во врска што резултираше со разводи. Љубовта помеѓу Белмондо и Андрес пукна во 1972 година, кога Белмондо ѝ фрли око на италијанската актерка Лаура Антонели. Со неа остана во мошне турбулентна врска до раните 80-ти години, кога повторно најде нова љубов на работа.

Во неговиот филм „Маргиналец“ од 1983 година, проститутката ја глумела бразилската пејачка и актерка Карлос Сото Мајор, на чиј шарм паднал Белмондо и останал со неа следните шест години. Во тој период снимиле уште два филма, а за разделбата била виновна нејзината љубомора.

Белмондо повторно се оженил во 2002 година со Нати Тардивел, која била повеќе од 30 години помлада од него, со која се запознал во 1989 година. Во 2003 година, им се родила и ќерката Стела, а по 20 години заеднички живот, парот се развел во 2008 година. Иако поранешните сопружници останале во добри односи и на овој брак, наводно, му пресудила друга жена.

За врската на Бебел со поранешната зајачица на „Плејбој“, Барбара Гандолфи, 40 години помлада од него, многу се пишувало, а се ширеле гласини дека нејзината намера била финансиски да го „олесни“ Белмондо. Врската прекинала во 2012 година.

Според пишувањето на италијанското издание на „Венити фер“, четири години бил во врска со 57-годишната француска актерка Валери Штефен. Примајќи го „Златниот лав“ на Филмскиот фестивал во Венеција 2016 година, актерот изјавил: „Уживав како луд. Се разбира, уживав да снимам филмови, но и да сакам до последен здив“.

До последен здив

А, до последниот здив на славниот Бебел, се чини, била една стара љубов од осумдесеттите години. На социјалните мрежи лани почнаа да се појавуваат фотографии од Белмондо и Бразилката Карлос Сото Мајор. Во јули годинава, тие беа видени во студиото „Галимард фрегранс“, каде што речиси 40 години по нивната романса, го измислиле парфемот именуван по филмот што ги спои „Маргиналец“.

„Збогум љубов моја! Нека ангелите те придружуваат на твојот пат кон вечноста. Ќе ги чувам твојата насмевка и спомените силно и нежно. Ме научи многу работи. Ќе ја паметам оваа фотографија снимена пред точно една година“, се збогувала Сото Мајор со Белмондо на Инстаграм.