Зринка Љутиќ триумфираше на слаломот во Крањска Гора
Хрватската скијачка Зринка Љутиќ победи на слаломот во словенечка Крањска Гора, а со втората последователна победа поведе во слалом и во генералниот пласман во Светскиот куп.
Препорачано
Љутиќ и Швајцарката Венди Холденер го поделија првото место по првото возење, а во вториот круг Зринка повторно го постави најбрзото време и славеше со 16 стотинки побрзо од Холденер. Трета беше Швеѓанката Ана Свен Ларсон (+1,19).
Минатата недела во Семеринг, Австрија, Љутиќ ја оствари првата победа во кариерата, а и тогаш, како и во Крањска Гора, го имаше стартниот број 2. Тоа е воедно и прва хрватска победа во Крањска Гора.
– Немам зборови. Се чувствував добро, сакав само да се засилам во финишот и речиси успеа. Сакам да им се заблагодарам на сите што дојдоа, ова е само почеток – рече Љутиќ по победата.
Со нови 100 поени, Љутиќ води на Светскиот куп со вкупно 456 поени пред Швеѓанката Сара Хектор (447) и Швајцарката Камил Раст (433). Во поредокот во слалом води 20-годишната загрепчанка со 309 бодови пред Раст (305).
