ЗОИ Пекинг 2022: Откако колабира на трката, норвешката бијатлонка експресно пратена дома
Норвешката бијатлонка Ингрид Ландмарк Тандреволд повеќе нема да се натпреварува на Зимските олимписки игри во Пекинг, откако на вчерашната трка доживеа целосен колапс на последниот километар.
– Ингрид не смее повторно да настапува на овие ЗОИ. Ќе ја однесеме на преглед да видиме што можеме да направиме за да не се повтори вакво нешто – изјави лекарот на норвешката репрезентација Ларс Колсруд.
Ингрид нема да има можност да им помогне на колешките од репрезентацијата в среда за кога е закажана женската штафетна трка во Жангџијаку, во која Норвежанките се фаворитки за златото.
– Одам дома, не смеам повеќе да настапувам на овие Игри. Сега сум добро. Мислам дека претерав во тешката трка на голема надморска височина. И порано сум имала проблеми со срцето, морам да бидам внимателна и да направам дополнителни прегледи – изјави Норвежанката.