Францускиот претседател Емануел Макрон ќе го прими својот украински колега Володимир Зеленски во Париз во понеделник, објави денес Елисејската палата, додека тим украински преговарачи отпатува во САД на разговори за планот на САД за прекин на конфликтот со Русија.

„Двајцата лидери ќе разговараат за ситуацијата и условите за праведен и траен мир, осврнувајќи се на преговорите во Женева и американскиот план, а во тесна консултација со нашите европски партнери.“

Исто така, ќе се разгледа работата преземена во врска со безбедносните гаранции во рамките на Коалицијата на волјата (сојузниците на Украина), соопшти француското претседателство, пренесуваат медиумите.

Киев беше цел на уште еден руски напад со беспилотни летала во текот на ноќта, само неколку часа откако Зеленски го отпушти началникот на својот кабинет, Андриј Јермак, по истрага за корупција.