Украинскиот претседател Володимир Зеленски ја повика меѓународната заедница да дејствува откако Русија истрела нова хиперсонична балистичка ракета кон Украина, велејќи дека тоа ги зголемило „размерите и бруталноста“ на војната меѓу двете земји.

„Светот мора да реагира, засега нема силна реакција. Мора да реагираме. Мора да извршиме притисок. Мораме да ја туркаме Русија кон вистински мир, што е можно само со сила“, напиша Зеленски на социјалните мрежи.

Според него, лансирањето на балистичка ракета со среден дострел против Украина е „доказ дека Русија апсолутно не сака мир“.

„Тоа е јасно и сериозно зголемување на обемот и бруталноста на оваа војна“, рече Зеленски.

Рускиот претседател Владимир Путин го потврди истрелувањето на ракетата Орешник, новото оружје за кое рече дека е незапирливо. Тој проектил не бил опремен со нуклеарна боева глава.

Според него, нападот бил насочен кон фабрика која произведува компоненти за ракети, во градот Днипро, во централна Украина.

Путин го претстави лансирањето како одговор на двата неодамнешни бомбардирања извршени од Украина на руска територија користејќи западни ракети ATACMS и Storm.

Зеленски рече дека Украина има „целосно право“ да користи оружје обезбедено од Западот против Русија, која ја нападна неговата земја во февруари 2022 година.