Украинскиот претседател Владимир Зеленски на партиски митинг изјави дека сака да остане на претседателската функција се додека не ги исполни сите свои изборни ветувања.

„Би сакал да останам претседател додека не ги исполниме сите предизборни ветувања”, го цитираше прес-службата на партијата, пренесе Тасс.

Тој, истовремено, нагласи дека неговата партиска програма „веќе ги нема сите одредби што не можат да се исполнат”.

Зеленски претседателската заклетва ја даде на 20 мај 2019 година, а, според  Тасс, неговото клучно изборно ветување тогаш беше дека ќе донесе мир во источниот регион Донбас.

За време на изборната кампања, Зеленски вети дека ќе остане на власт само еден претседателски мандат.

Следните претседателски избори во Украина ќе се одржат во 2024 година.

Досега Зеленски не одговараше директно на прашањата на медиумите за неговите планови да се кандидира за уште еден претседателски мандат.

Извор: МИА