Европските амбасадори вчера на средба во Москва повикаа на мир со Украина, додека Киев најави дека ќе побара дополнителни 20 милијарди долари воена помош за да го одржи притисокот на фронтот, пренесува „Гардијан“.

Британскиот, францускиот и германскиот амбасадор во Русија повикаа на директни разговори меѓу Москва и Киев на ретка средба во руското Министерство за надворешни работи.

Тројцата европски лидери претходно неделава се сретнаа со украинскиот претседател Володимир Зеленски во Лондон.

Во заедничко соопштение по состанокот во Москва, трите земји наведоа дека ѝ ги пренеле на руската страна клучните заклучоци од самитот во Обединетото Кралство, вклучително и поддршката за повикот на претседателот Зеленски за директни разговори со рускиот претседател Путин.

Европските амбасадори ретко одржуваат разговори со руски функционери за време на војната, но често се повикувани во Министерството за надворешни работи.

Москва соопшти дека на амбасадорите им било пренесено дека нивните земји водат деструктивна политика кон Украина, обвинувајќи ги дека сакаат да ја продолжат војната против Русија во име на европските држави.

Зеленски денеска со европските лидери во Лондон—Што подготвува сега Европа за Украина?

Неколку западноевропски земји – меѓу кои и Франција – изнесоа идеи за повторно започнување дијалог со Москва со цел завршување на војната.

Преговорите под водство на САД за нејзино завршување засега не донеле резултат, но Русија во минатото претпочитала разговори со администрацијата на Доналд Трамп, при што Кремљ не сакал европските земји да бидат вклучени.

Во меѓувреме, Украина најави дека ќе побара дополнителни 20 милијарди долари воена помош од своите сојузници, со цел да го зацврсти она што го смета за своја моментална предност на бојното поле.

Барањето ќе биде поднесено следниот четврток на состанокот на Контакт групата за одбрана на Украина – сојуз од повеќе од 50 земји, познат и како „Рамштајн група“, каде што сојузниците ја координираат финансиската и воената помош за Киев.

„Имаме временски прозорец од шест до девет месеци на бојното поле кој бара итно забрзување на финансирањето“, изјави извор од украинската одбрана.

Според изворот, некои сојузници ќе бидат замолени да придонесат меѓу 2 и 6 милијарди долари секој, за да се достигне целта од 20 милијарди долари, било во форма на помош или заем.

Украина подготвена за преговори: „Важно е Русија да најде сила да ја заврши оваа неправедна војна“