Град Скопје за зелениот покрив на трговскиот центар „Мавровка“ ќе издвои 45 милиони денари. Ова е посочено во една од главните точки на денешната 74-та седница на Советот на Град Скопје.

„Советот на Град Скопје ќе расправа и за Предлог-Одлуката за давање донација на ДТЦ Мавровка, со која Град Скопје ќе го донира проектот и изведбата на новиот зелен покрив што ќе се прави на ДТЦ Мавровка. Донацијата се состои од реконструкција- изведба на зелен покрив, со фази во кои ќе бидат опфатени архитектурата и хортикултурата, како и електротехниката, а вредноста на истата се проценува на околу 45 милиони денари со вклучен ДДВ“, се вели во одлуката на дневен ред.

Трговскиот центар „Мавровка“ ќе го добие третиот и најголем зелен покрив во Скопје. Меморандумот за соработка за овој проект го потпишаа Градот Скопје, Општина Чаир и Здружението на корисници на деловниот простор во „Мавровка“.

По ГТЦ и зградата на Домот на градежници, ова ќе биде трет, но и најголем зелен покрив на вкупна површина од 4 000 квадратни метри на која ќе се засадат 40 различни видови садници.