Здравиот банкарски систем овозможи соодветен одговор на кризата
Ангеловска – Бежовска: Клучно е што во изминатиот период е создаден соодветен монетарен простор што сега овозможува соодветни мерки за одговор на предизвиците од корона-кризата.
Гувернерката на Народна банка, Анита Ангеловска-Бежоска во обраќање на годинешниот Економски и финансиски дијалог меѓу ЕУ, Западен Балкан и Турција посочи дека високото ниво на девизните резерви и здравиот банкарски систем на земјава и овозможуваат соодветно да одговори на предизвиците од корона-кризата.
Според неа клучно е што во изминатиот период е создаден соодветен монетарен простор што сега овозможува соодветни мерки за одговор на предизвиците од корона-кризата.
– Простор за маневри пред сѐ се темели на нивото на девизните резерви, коешто значително порасна во изминатиот период, како резултат на подобрувањето на економските фундаменти и на надворешната позиција на македонската економија, како и на здравиот банкарски систем со солидна ликвидност и адекватна капитална позиција, што се резултат и на засилената регулаторна и супервизорска рамка на централната банка, истакнува гувернерката.