Олимпискиот оган за Зимските олимписки игри во Пекинг кои ќе се одржат од 4 до 20 февруари 2022 година, денеска е запален во древната Олимпија, место од каде традиционално го започнува патот кон градот домаќин.

Олимпискиот оган е запален нешто по 12 часот по локално време и тоа на традиционален начин во Олимпија.

За прв пат по ред и трет пат во историјата на модерните Олимписки игри, традиционалната церемонија е одржана зад затворени врати поради пандемијата на коронавирусот.

На свечената церемонија присуствуваа претседателот на Меѓународниот олимписки комитет (ИОК) Томас Бах, претседателката на Грција Катерина Сакеларопулу како и претставници на грчкиот и кинескиот олимписки комитет и помал број на новинари.

– Во овие тешки времиња во кои живееме, Зимските олимиски игри во Пекинг ќе бидат важен момент за собирање на светот во духот на мирот, пријателството и солидарноста – изјави Томас Бах.

Церемонијата не помина без инциденти и тоа благодарение на активистите од Тибет кои протестираат против кршењето на човековите права во Кина и се обидоа да дојдат до местото каде се одржа церемонијата на палење на олимпискиот оган.

Тие ја преминаа ограда и трчаа кон Храмот на божицата Хера каде се одржуваше церемонијата притоа држејќи транспарент „Не за геноцидните Игри“ по што беа уапсени.