Закерберг отпушти 10% од работната сила на „Мета“
„Мета“ отпушти 10 проценти од својата работна сила, потег што се очекуваше речиси еден месец. Во интерно писмо до вработените, извршниот директор Марк Закерберг ги објасни причините и насоката во која се движи компанијата.
Препорачано
Закерберг им се заблагодари на вработените кои беа погодени од отпуштањата, ја нагласи важноста на вештачката интелигенција, рече дека не треба да има дополнителни намалувања во 2026 година и ја претстави својата визија за иднината на компанијата. Заедно со отпуштањата, „Мета“ преместува 7.000 вработени на позиции поврзани со вештачката интелигенција, објави CNBC.
„Но, успехот не е загарантиран. Вештачката интелигенција е најважната технологија на нашето време. Компаниите што го водат патот ќе ја одредат следната генерација“, рече Закерберг во меморандум објавен на X од новинар на „Њујорк тајмс“, а извор запознаен со ситуацијата ја потврди неговата автентичност за NBC News.
По протекувањето информации минатиот месец за претстојните отпуштања, раководителите на „Мета“ потврдија, непосредно пред објавувањето на резултатите за првиот квартал од 2026 година, дека компанијата се подготвува да отпушти околу 10 проценти од своите вработени.
Реорганизацијата, која „Мета“ ја опиша детално за прв пат во интерен меморандум во април, вклучува елиминација на околу 8.000 работни места и непополнување на околу 6.000 отворени позиции. Компанијата претходно ја потврди автентичноста на меморандумо. Вработените опфатени со ова реструктуирање беа известени вчера.
Во април, „Мета“ објасни дел од финансиската позадина на одлуката, велејќи дека се зголемуваат капиталните расходи за 2026 година на помеѓу 125 и 145 милијарди долари. Причината се „очекувањата за повисоки цени на компонентите оваа година и, во помала мера, дополнителни трошоци за центри за податоци за иден капацитет“, се наведува во извештајот за првиот квартал од 2026 година.
„Ова е најдинамичниот период што сум го видел во нашата индустрија. Оптимист сум за сè што градиме за да им овозможиме на милијарди луѓе да се изразат себеси и да се поврзат со луѓето за кои се грижат. Ја трансформираме нашата компанија за да се осигураме дека таа е секогаш најдоброто место за талентирани луѓе кои сакаат да имаат најголемо влијание“, рече Закерберг во меморандум испратен вчера.
Тој истакна дека им е „благодарен на оние што си заминуваат денес“ и додаде дека компанијата не е доволно транспарентна, како што би сакал. Тој нагласи дека ова мора да се промени во иднина.
Вработените во САД кои беа отпуштени ќе добијат отпремнина што вклучува четиримесечна плата, плус дополнителни недели за секоја година служба во „Мета“, според интерно меморандум од април од главниот директор за човечки ресурси Џанел Гејл. Исто така, се обезбедува дополнителна поддршка, вклучително и помош со имиграциски прашања и здравствено осигурување.
