Ракометната репрезентација на Словенија ги започна подготовките пред настапот на Европското првенство кое ќе се игра во Унгарија и Словачка (13-30 јануари) и каде првиот натпревар ќе го игра против Македонија.

Натпреварот ќе се игра на 13 јануари во Дебрецин, а селекторот на Словенија, Љубомир Врањеш, вели дека победа над Македонија е главната цел на неговите ракометари бидејќи тоа им ги отвора вратите за пласман во наредната рунда. Покрај Македонија и Словенија, во групата А која се наоѓаат уште и Данска и Црна Гора.
– Првата цел е да ја победиме Македонија бидејќи тој триумф ни носи пласман во следната фаза – изјави Врањеш.

Првиот дел од подготовките, Врањеш ќе го посвети на физичката подготовка на ракометарите иако на нив ќе недостасуваар неколку ракометари кои ќе се приклучат на репрезентацијата на почетокот од идната година.

– Првите денови од подготовките ќе ги искористите за играчите да се рехабилитираат по клупските настапи. Најголем дел од нив се одлично физички подготвени бидејќи дојдоа од екипи кои пред десетина дена ги завршија настапите оваа година и имаа доволно време за одмор. Мора да се фокусираме на физичката сила и поради тоа ќе тренираме во теретана – додава Врањеш.

Според планот на селекторот Врањеш, Словенија ќе одигра три контролни натпревари, а првиот ќе се игра утре во Целје против Хрватска. На почеток од идната година ќе следат уште два натпревари против Италија.