Неодамнешното писмо кое претседателот на Македонија, Стево Пендаровски, го испрати до  Цариградската патријаршија со кое побара официјално признавање Македонска православна црква – ОА, беше повод српски „Блиц“ да побара став од расчинетиот владика Јован Вранишковски, кого СПЦ го признава како архиепископ на Православната Охридска Архиепископија – ПОА. 

Позицијата на Српската православна црква за тоа прашање беше дефинирана во 2002 година – најширока автономија да, независност не, пишува српски „Блиц“.

Барањето на Пендаровски, Вранишковски за „Блиц“ го толкува како влијание на политиката во црковните работи.

– Претседателот на Северна Македонија требаше прво да биде информиран за тоа што значи „апелационо право“ и дали го има Цариградската патријаршија за да се решат прашањата во надлежност на другите автокефални цркви. Вака се чини несериозно претседателот на една држава да бара нешто што е адресирано некому кој не е во можност тоа да го достави. Северна Македонија не е теократска држава и претседателот нема никакво право да привилегира една верска заедница на сметка на друга, вели тој.

Запрашан „дали државниот врв на Македонија ја деградира СПЦ и го користи конфликтот меѓу Цариградската патријаршија и Московската патријаршија по украинското прашање, за да постигне автокефалност на МПЦ“, Вранишковски одговори:

-Украинската црква ја признаа само од три од 14 локални цркви. Ако истото неканонско признавање на автокефалноста се примени и на МПЦ, сигурен сум дека ниту толку цркви ќе го прифатат тоа. Време е да се работи на санирање на распаднатото единство меѓу православните, што дојде по признавањето на автокефалноста во Украина, и да не се отвораат нови фронтови до кои неминовно би стигнале доколку автокефалноста се признае во друга црква неканонски и еднострано- вели тој.

Пендаровски за писмaта до патријархот Вартоломеј: Нема ништо спорно