Претседателот Стево Пендаровски изјави дека не гледа ништо спорно во писмата што се испратени до вселенскиот патријарх Вартоломеј за признавање на автокефалноста на Македонската православна црква (МПЦ).

– Не постои ниту една држава од православниот свет што не ја подржувала и денес и порано својата православна црква за да биде повидлива во семејството на православни цркви. Она што треба да се спомене, а не го гледам во тие анализи кои забележуваат мешање на световната и црковната власт, е неоспорен факт оти Македонската правиславна црква и кога не сме имале држава, била во заштита на македонскиот идентитет, изјави Пендаровски по седницата на Советот за безбедност, како одговор на новинарско прашање во врска со коментарите дека неговото писмо и писмото на премиерот Зоран Заев до патријархот Вартоломеј се мешање на световната во црковната власт.