Во Холивуд владее вистинска трка околу тоа кој прв ќе сними филм или серија за падот на поранешниот принц Ендру, пишува „Дејли мејл“. Извор од студиото Дизни за „Дејли мејл“ изјавил дека интересот е огромен:

„Во Холивуд е во тек трка кој ќе сними филм за Ендру“, рекол изворот од Дизни.

Приказната за неговите врски со осудениот педофил Џефри Епстин, како и неодамнешното апсење, повторно ја потресе британската јавност, а сега би можела да биде пренесена и на малите екрани. Се разгледуваат проекти посветени на најголемите кралски скандали, при што во центарот би бил токму неговиот пад.

Наводно, веќе извесно време се размислува за специјални епизоди во рамки на серијата „Круна“.

„Настаните од минатата недела се историски и без преседан. Веќе извесно време се разговара со продукциската куќа ‘Лефт Банк Пикчрс’, која стои зад ‘Круна’, за посебни епизоди посветени на кралските драми. Серијата заврши, но името ќе живее понатаму“, рекол изворот.

Според истиот извор, идејата за ограничена серија сместена во универзумот на „Круна“ е прилично развиена:

„Разговарано е за проект во рамки на ‘Круна’ кој би ја следел сагата на принцот Ендру. Таа приказна е подеднакво драматична, ако не и повеќе, од сè што е прикажано во оригиналната серија, вклучувајќи ја абдикацијата и смртта на принцезата Дијана“, додал изворот.

Интересно е што Питер Морган, креаторот на „Круна“, претходно изјавувал дека сака да се држи подалеку од актуелни настани. Но додека Нетфликс ги анализира следните чекори, конкуренцијата не мирува. И други стриминг-платформи гледаат можност во драматизацијата на стрмоглавиот пад на Ендру.

Британските медиуми наведуваат дека во игра се и „Дизни Плус“ и „Амазон Прајм“. Амазон веќе ја обработи темата преку драма за интервјуто на Ендру за емисијата „Њузнајт“ на „Би-би-си“ во 2019 година, каде што го глумел Мајкл Шин. Нетфликс, пак, го сними филмот „Скуп“ за истото интервју, со Руфус Сјуел во улогата на посрамениот војвода и Џилијан Андерсон како новинарката Емили Мејтлис.

Сценаристот Џереми Брок, кој стои зад триделната драма „Многу кралски скандал“ од 2024 година, изјавил дека разговорите веќе се водат:

„Сигурен сум дека извршните директори на Нетфликс и Амазон веќе разговараат. Ова е исклучително драматична и необична приказна, а некаде сигурно веќе се пишува сценарио. Во оваа драма има толку многу елементи: Ендру, кралското семејство, полицијата која мораше да биде многу внимателна при неговото апсење, жртвите на Епстин и неговите моќни пријатели. Како тоа влијае врз Беатрис и Јуџини?“

Трката меѓу продукциските куќи се засили само неколку недели по апсењето на Ендру, кое се случи на неговиот 66-ти роденден. Тој поминал 11 часа во притвор во Норфолк под сомнение за злоупотреба на службената положба, а полицијата од областа Темс Вали потврдила дека истрагата сè уште е во тек.