Викендов Македонија ќе ја погоди студен воздушен бран од североисток кој ќе донесе значително заладување, силен северен ветер и локално провејување на слаб снег, прогнозираат синоптичарите.

Според Управата за хидрометеоролошки работи, се очекува силен северен ветер, кој повремено и локално ќе достигнува брзина од над 80 километри на час.

Во Скопје и околината времето ќе биде многу студено, со услови за провејување на слаб снег во одделни делови од котлината. Северниот ветер повремено ќе достигнува брзина од 60 до 70 километри на час.

Утринските температури за време на викендот ќе се движат од -7 до 0 степени, додека дневните максимални ќе бидат меѓу -3 и 4 степени Целзиусови.

Дополнително заладување се очекува во понеделник, 29 декември, кога утринските температури ќе се спуштат од -10 до -2 степени, а на повисоките населени места и планините и под -10 степени, велат од УХМР.