Актерката Весна Бејби Петрушевска , направи важен чекор во борбата за безбедноста на најмладите во дигиталниот простор. По интензивна кампања за собирање потписи преку платформата Change.org, таа објави дека петицијата е официјално поднесена до надлежните институции.

Преку емотивна објава на социјалните мрежи, Петрушевска им се заблагодари на сите граѓани кои ја поддржаа нејзината иницијатива, нагласувајќи дека ова е само почеток на една поширока дебата за менталното здравје на младите.

„Ви благодарам, јас тоа што го ветив го реализирав. Се надевам на широка дебата и само посакувам добро ментално здравје на младите, вие не сте свесни колку е тоа важно. Нешто направивме за нашите деца“, порача актерката, апелирајќи до граѓаните да продолжат со потпишувањето бидејќи секој нов глас ја зголемува довербата и тежината на оваа иницијатива.

Иницијативата на Петрушевска доаѓа во време кога светот воведува строги регулативи. Австралија веќе забрани социјални мрежи за помлади од 16 години, додека Франција воведе „дигитално полнолетство“ на 15 години. Со поднесувањето на оваа петиција, и Македонија се приклучува на глобалниот аларм за заштита од сајбер булинг и штетните алгоритми кои ги таргетираат малолетниците.

Се очекува институциите да ја стават петицијата на разгледување, со што би се отворил патот кон законски измени што ќе значат „црвено светло“ за неконтролираното влијание на социјалните мрежи врз македонските деца.