Ватикан ѝ врати на Грција три дела од скулптури своевремено однесени од храмот Партенон во Атина, откако лани Папата Франциск ја најави одлуката за враќање на артефактите стари 2.500 години, јавува „Би-би-си“.

Деловите од мермерните скулптури – глава на коњ, глава на маж со брада и глава на момче, биле дел од колекцијата на Ватикан околу два века.

Грција се надева дека потегот на Ватикан ќе поттикне и други земји да ги вратат скулптурите од Партенон украдени низ вековите. Само околу половина од оригиналните скулптури во Партенон се зачувани, а поголемиот дел од другата половина се наоѓаат во Британскиот музеј во Лондон.

На почетокот на 19 век, скулптурите кои се во Лондон биле украдени од Партенон по наредба на шкотскиот благородник Томас Брус, познат како Лорд Елгин. Тој потоа им ги продал скулптурите на властите, кои ги изложиле во Британскиот Музеј.