Околу 300 срни и елени се спасени во рускиот регион Новосибирск, откако раниот студ и прераната зимска миграција ги затекнала на целосно замрзнати езера, каде животните не можеле ниту да се исправат, ниту да се движат по лизгавиот мраз, пренесе „Еуроњуз“.

Наместо да продолжат кон шумските подрачја, срните останале заглавени на голите ледени површини, лизгајќи се и беспомошно лежeјќи со часови.

Прво помогнале локалните рибари, кои лично извлекле десетици заглавени животни и го снимале драматичниот спасувачки напор. На снимките се гледаат луѓе како внимателно ги носат исплашените срни по мразот, обидувајќи се да ги оддалечат од опасните површини додека животните се обидуваат да се исправат.

Министерството за природни ресурси соопшти дека „голем дел од животните преживеале“, иако дел од нив биле пронајдени мртви пред да пристигне помошта.