Американскиот воен пилот успеал да издржи 36 часа зад непријателските линии во Иран, и покрај тоа што бил тешко ранет, а за неговото преживување клучна била специјалната обука СЕРЕ, пишува „Волстрит журнал“.

Станува збор за елитен тренинг на американските воздухопловни сили, наменет за пилоти и за припадници на специјални единици кои би можеле да се најдат сами на територија под контрола на непријателот. Името СЕРЕ е кратенка од англиските зборови за преживување, избегнување, отпор и бегство (Survival, Evasion, Resistance and Escape).

Според поранешниот генерал Давид А. Дептула, целта на оваа програма е да ги подготви војниците да останат живи во екстремни околности, да не бидат заробени и да ги зголемат шансите за успешно спасување.

Пилотот на ловец „Ф-15“, кој бил соборен над Иран, преживеал во тежок планински и непристапен предел, додека локалните сили интензивно трагале по него. Неговото фаќање ќе претставувало важна пропагандна и политичка победа за Техеран.

Обуката се заснова на четири главни елементи. Првиот е преживување, што опфаќа справување со повреди, наоѓање засолниште, вода и храна во сурови услови. Во рамки на ваквиот тренинг, пилотите вежбаат и практични техники како импровизирано засолнување, палење оган без опрема и снаоѓање со минимални ресурси.

Вториот дел е избегнување, односно како да не бидат забележани. Тука учат да се движат внимателно, особено ноќе, да го користат теренот за прикривање и да комуницираат со спасувачките тимови без да ја откријат својата локација.

Третиот сегмент се однесува на отпор во случај на заробување. Иако овој дел од програмата е доверлив, познато е дека се потпира на принципи развиени по искуствата од Корејската војна.

Последниот столб е бегство, односно користење тактики и опрема за враќање на безбедна територија. Според воени експерти, токму ваквата обука честопати ја прави клучната разлика меѓу живот и смрт, но и меѓу спасување и заробеништво.

ФОТО | Соборен е американски борбен авион, пилотот паднал во рацете на Иранците