Во СЦ „Јане Сандански“ голема и важна победа остварија кошаркарите на МЗТ Скопје Аеродром во борбата за опстанок во АБА лигата.

Македонските шампиони триумфираа против Цедевита Олимпија од Словенија со конечен резултат 79:74 (19:21, 22:14, 15:17, 23:22).

Тимот на Драган Николиќ одигра еден храбар меч што на крајот му донесе триумф. Освен во првата четвртина, во која противникот делумно беше рамноправен, во преостанатиот дел МЗТ беше во водство, го диктираше темпото, а во еден момент имаше и „плус 14“ (37:23). Љубљанчани својот квалитет го покажуваа во неколку наврати, но најмногу до изедначување, на што МЗТ веднаш одговараше со нова серија и водство кое на крајот беше недостижно за „змајчеки“.

Американецот Кук за „металците“ доминираше со 26 поени, следен од В. Стојановски кој запиша 18. На спротивната страна Американецот Адамс постигна 15 поени, а три помалку имаше Матковиќ.

Аеродромци по третиот триумф сезонава во регионалното натпреварување и натаму се на последната 14 позиција со 21 бод, колку што имаат и Борец, Игокеа и Морнар Бар. Екипата на Цедевита Олимпија која го претрпе петтиот пораз (трет во низа) е на четвртото место со 29 бодови, колку и третопласираниот ФМП Београд.

Во следното коло составот на МЗТ ќе ги одмери силите против црногорскиот Морнар Бар.