Единствениот кружен тек на улицата „Орце Николов“ во Дебар Маало не издржа повеќе од пет години од неговата изградба, земајќи предвид дека калдрмата на која е поставен е целосно нерамна и оштетена поради големиот проток на возила во текот на денот.

Во должина на улицата има само две локации на кои е поставен овој тип подлога, која не е асфалтна, туку е калдрма составена од бекатонски коцки кои, како што се покажало во минатото, немаат долг рок на траење и по неколку години почнуваат да пропаѓаат, да се подигнуваат или пак да се кршат, со што кружниот тек и паркинг-просторот пред Општина Центар се навистина предизвик за возачите и за каросеријата на нивните возила.

Поставувањето на овој кружен тек беше во рамките на обновата и проширувањето на улицата „Орце Николов“, кога се поставија тесни вело-ленти и нови тротоари, како и паркинг „џебови“ за резидентите и за зонските паркинзи.

Проектот го започна ексградоначалникот на Центар, Саша Богдановиќ, а беше целосно реализиран во 2021 година, кога оваа улица, која е една од главните сообраќајни „артерии“ во Центар, се прошири и се реновираше од крстосницата со булеварот „Климент Охридски“, сè до крстосницата со „Френклин Рузвелт“.

Реконструкцијата се изведуваше во шест фази, секоја опфаќаше посебен дел од улицата, а кружниот тек се постави на крстосницата меѓу улиците „Орце Николов“ и „Ленинова“, локација што дотогаш беше една „црна точка“ за возачите и место каде што често се случуваа сообраќајни незгоди.

Целосната реконструкцијата на „Орце Николов“ заврши во втората половина од 2021 година, опфати површина од вкупно 7.182 метри квадратни, а целиот зафат чинеше 64,8 милиони денари или нешто повеќе од еден милион евра, обезбедени од општинскиот Буџет.

Сепак, само пет години по неговата изградба, калдрмата на која е сместен овој мал, но важен кружен тек, денес е целосно нерамна и очигледно не може да го издржи бројот на возила што минуваат преку улицата.

„Слободен печат“ испрати прашања до Општина Центар дали имаат план за реновирање на овој дотраен кружен тек и дали повторно се размислува на поставување калдрма или, пак, ќе се одлучат за некој поиздржлив модел, а оттаму ни одговорија дека кружниот тек ќе се обнови како дел од проектот за реконструкција на улицата „Ленинова“, која директно излегува на овој кружен тек.

– Што се однесува до реконструкцијата на кружниот тек на улицата „Орце Николов“ во Дебар Маало, тој е предвиден со реконструкцијата на улицата „Ленинова“, на потегот од булеварот „Партизански одреди“ до Паркот на франкофонија – известија од Центар.

Од локалната самоуправа информираа дека реконструкцијата на „Ленинова“, а воедно и на кружниот тек, ќе почне во текот на март годинава.
Проектот предвидува нов асфалт, обновена атмосферска и водоводна канализација, нови тротоари и ЛЕД улично осветлување, како и воведување резидентен паркинг на овој потег, со што, според Општина Центар, на жителите значително ќе им се олесни секојдневието и ќе се придонесе кон намалување на сообраќајниот хаос.