Новак Ѓоковиќ без поголеми проблеми денеска се пласираше во четвртфиналето на АТП турнирот кој се одржува во Тел Авив, Израел.

Србинот после 16 години повторно игра на израелското тло, а во второто коло беше убедлив против Шпанецот Пабло Андухар кој го елиминираше со 6:0 и 6:3. Ова беше вкупно трет меч меѓу Ѓоковиќ и Андухар, и трета победа за српскиот ас.

После точно 81 ден ова беше прв меч за Ѓоковиќ на турнир кој се бодува, после финалето на „Вимблдон“ кога го совлада Ник Кирјос од Австралија.

За пласман во полуфиналето Ноле ќе игра против Канаѓанецот Васек Поспишил кој беше подобар од домашниот натпреварувач Едан Лешем со 6:3 и 6:2.

Во останатите денешни мечеви: Лестјен (Фра) – Руусувуори (Фин) 2:0, Ван Де Зандшулп (Хол) – Броуди (Бри) 1:2 и Шварцман (Арг) – Риндеркнех (Фра) 1:2.

Во другите четвртфинални дуели се среќаваат: Риндеркнех (Фран) – Сафиулин (Рус), Лестјен (Фра) – Креси (САД) и Броуди (Бри) – Чилиќ (Хрв).