Директорот на ЈП Железници Инфраструктура, Синиша Ивановски денеска објави дека е пробиен и последниот од 15-те тунели на пругата Бељаковце-Крива Паланка. Тој вели дека следните месеци очекува „посериозна активност и видлив прогрес“ во изградбата на пругата.

„Бележиме прогрес. Изутринава го пробивме и последниот тунел од вкупно 15те од вториот дел од градбата на пругата кон Бугарија ( Бељаковце – Крива Паланка). Пробивањето на тунелите се смета за една и од поспецифичните градежни активности. А на овој проект оваа позиција е веќе завршена. И натаму моменталниот прогрес од страна на изведувачот не е според очекувањата но можам да соопштам дека најспецифичните сегменти од проектот полека се надминуваат и очекувам месеци на посериозна оперативна активност и видлив прогрес. Коридорот 8 е од стратешко значење за Македонија и за НАТО и како таков сериозно се работи на неговата изградба и поврзување на Јадранско Море со Црно Море”- Ивановски напиша на Фејсбук.

Вицепремиерот и министер за транспорт на земјава, Александар Николоски и неговиот бугарски колега Гроздан Караџов на 6 ноември го потпишаa Договорот за подготовка, изградба и оперативност на меѓуграничниот железнички тунел меѓу Македонија и Бугарија, со што, двете земји ги дефинираа активностите и меѓусебните обврски за изградба на меѓуграничниот железнички тунел на Коридорот 8.

Подобра транспортна врска меѓу Црното и Јадранското Море – Македонија и Бугарија потпишаа договор за дел од Коридор 8