Американската војска утрово изврши нови напади врз Иран со цел да го задржи отворен Ормускиот Теснец, што предизвика ирански напади врз Кувајт и врз Бахреин во најновата ескалација на конфликтот, објави „Ројтерс“.

Најновата рунда напади, за кои САД велат дека биле одговор на нападот во вторникот врз три товарни бродови што минувале низ теснецот, следуваше неколку часа откако претседателот Доналд Трамп изјави дека верува оти привремениот прекин на огнот со Иран е „завршен“.

„Силите на Централната команда на САД започнаа дополнителни напади врз Иран за дополнително да ја намалат неговата способност да ја загрозува слободата на пловидба во Ормускиот Теснец. САД го повикуваат Иран на одговорност за неодамнешната неоправдана агресија врз комерцијалниот поморски сообраќај и цивилните екипажи кои слободно пловат низ меѓународен воден пат“, објави командата на американската војска за Блискиот Исток (ЦЕНТКОМ).

Американските напади ги потресоа неколку градови долж јужниот брег на Иран, а во некои области предизвикаа прекин на електричната енергија.

Меѓу погодените места бил и Бандар Абас, каде што се наоѓа најголемото пристаниште во Иран, како и важни објекти на морнарицата и на Револуционерната гарда покрај Ормускиот Теснец.

Иранските медиуми објавија дека пожарникар загинал во напад врз аеродромот во југоисточниот град Ираншахр.

Иран возврати со втор ден напади врз Кувајт и врз Бахреин, каде што се наоѓаат американски воени бази.

Just a while ago, At least 20 explosions heard in Bandar Abbas, Iran followed by fighter jets sounding. Multiple IRGC positions have been hit in renewed air strikes by the United States Airforce. pic.twitter.com/hfQP8kaHma

— Baba Banaras™ (@RealBababanaras) July 8, 2026

Министерството за одбрана на Кувајт соопшти дека пресретнува ракети и дронови, додека Катар накратко издаде предупредување за „зголемена безбедносна закана“, пред подоцна да соопшти дека опасноста поминала.

„Ова е одмазда за вчерашното бомбардирање на бродовите од страна на Иран. Ако тоа се случи повторно, ќе биде многу полошо“, напиша Трамп на својата платформа „Трут сошиал“.

Контролата врз теснецот, низ кој пред војната поминувала една петтина од светските залихи на нафта, му даде на Техеран големо влијание, овозможувајќи му практично да предизвика застој во односите со најмоќната војска во светот.

Иако Иран не ја презеде одговорноста за нападите врз бродовите, аналитичарите велат дека Техеран користи вакви дејства за да ја зајакне својата позиција во преговорите.

„САД сè уште не сфатија дека заплашувањето и прекршувањето на обврските повеќе не поминуваат без последици. Да бидам јасен: ако нападнете, ќе ви биде возвратено. Ормускиот Теснец ќе биде повторно отворен само според ирански услови, а не под закани од САД“, напиша главниот ирански преговарач, Мохамад Бакер Галибаф, на „Икс“.

Најновата размена на напади ги намали надежите дека меморандумот за разбирање потпишан на 17 јуни ќе биде претворен во траен договор за завршување на војната, која започна со американско-израелските напади врз Иран на 28 февруари.

ВИДЕО | Иран ги нападна американските воени објекти во Бахреин и Кувајт