Екипата на Вардар 1961 плеј-офот во Суперлигата го почна славејќи на гостувањето кај Алкалоид со тесни 33-32. За вторпат во краток период, Иван Чупиќ ја надмудри легендата Кирил Лазаров, потврдувајќи дека Вардарци го имаат рецептот за победи против својот ривал.

Дуелот беше вистинско дерби, исполнето со пресврти и неизвесност. Првото полувреме се играше како рововска битка, водството постојано се менуваше, а двете страни немаа повеќе од еден гол предност. Вардар прв направи серија пред паузата, казнувајќи ги грешките на Алкалоид и стигна до највисоки +4 (15-19), но домаќините успеаја да ја намалат разликата на 17-19 на одмор.

Во вториот дел, грубата игра на момент на ракометарите на Алкалоид им донесоа два седмерци на гостите, кои веднаш ги искористија за да се одлепат на +4 (19-23). Сепак, Борзаш и Костески вратија надеж на домаќините со голови за 22-24 и 24-25, додека разликата постојано се менуваше до 26-27. Потоа, со голот на Вардар за 26-28, Валах дојде до осмата интервенција, а Хориха од пивот зголеми на +3 (26-29), што практично го реши натпреварот.

На нешто повеќе од минута пред крајот, Алкалоид имаше шанса да внесе неизвесност, но Валах го прочита шутот на Тордарсон, за Вардар да го забележи првиот триумф во плеј-офот. Ќе потсетиме, минатата недела Вардар исто така славеше во Автокоманда во последниот натпревар од првиот дел од сезоната.

ГАЛЕРИЈА | Вардар славеше во дербито против Алкалоид во Автокоманда