Поранешниот шпански репрезентативец Андрес Иниеста, еден од најдобрите играчи од средниот ред што фудбалот некогаш ги имал, зборуваше пред финалето на Светското првенство (недела, 19 јули, 21.00 часот) и ја предупреди својата земја за најголемата закана што доаѓа од Аргентина – Лионел Меси.

Легендарниот играч од средниот ред, стрелец на победничкиот гол во финалето на Светското првенство во 2010 година, смета дека обидот целосно да се неутрализира аргентинскиот капитен не е реална задача. Според него, Шпанија не смее да гради план на игра само околу запирање на еден фудбалер, туку мора да наметне свој стил и да ги користи своите квалитети.

Во разговор за El Partidazo de COPE, Иниеста истакна дека Меси е играч кој не може целосно да се „елиминира“ од натпреваро:

– Невозможно е целосно да се затвори. Повеќе ќе се прави околу тоа колку Шпанија може да ја загрози Аргентина со својата игра, создавање шанси и смиреност во реализацијата кога таа ќе дојде – рече Иниеста.

Тој имаше посебни зборови за својот поранешен соиграч од Барселона, со кого ја делеше соблекувалната со години и ги освои најголемите трофеи.

– Немам зборови, или едноставно не знам како да го опишам тоа. Решителноста, вербата и сè што прави во секој натпревар е нешто што едноставно мора „да му симнете капа“ – се зборовите на Иниеста.

Иниеста зборуваше и за можноста финалето да биде одлучено од еден момент или од еден стрелец. За него, како што вели, единствено важно е крајниот резултат и освојувањето на трофејот.

– Не е ни дилема, бидејќи мојот одговор е дека не ме интересира кој ќе го постигне голот. Важното, исто како и тогаш, е да го напуштиме теренот како шампиони. Кој ќе го постигне голот не е важно, сè додека голот ја носи победата – вели Иниеста.

Пораката на легендарниот Шпанец е јасна – Меси ќе биде закана до последниот момент, но патот до победата нема да води низ неговата изолација, туку низ храбрата и препознатлива игра на целиот тим.