Светските обложувалници непосредно пред почетокот на новата сезона во машката ракометна Лига на шампионите го предвидуваат шампионот. Букмејкерите сметаат дека Барселона во сезоната 2020/21 има најголеми шанси да дојде до тронот.

На Ф4 турнирот следната година според обложувалниците би требало да се најдат уште ПСЖ, Кил и Веспрем, токму истит екипи кои кон крајот на годинава (28-29 декември) ќе играат во Келн за трофејот за сезоната 2019/20.

Вардар 1961 кој и натаму е актуелен европски шампион е рангиран дури на осмата позиција, а пред „црвено-црните“ се наоѓаат уште Кјелце, Фленсбург и Пик Сегед.

Зад играчите на тренерот Стевче Алушовски се Нант на Кирил Лазаров и Порто на Никола Митревски, потоа Алборг, Мешков Брест, Целје, ППД Загреб, Елверум и Мотор.

Првиот меч Вардар 1961 ќе го има утре, в среда (16 септември) со почеток од 18.45 часот во Белорусија против Мешков Брест.