Грција е позната по своите преубави острови кои привлекуваат милиони туристи секоја година. Иако многу острови се познати како луксузни дестинации, како Миконос и Санторини, постојат и оние кои се исклучително достапни за туристи со ограничен буџет, а сепак нудат автентично грчко искуство. Без разлика дали барате релаксација на песочни плажи, истражување на живописни села или активен одмор со разгледување, Грција има острови кои нудат сѐ тоа по поволни цени.

„Грчка инфо“ ги издвои островите кои не само што овозможуваат да уживате во убавините на Грција без големо финансиско оптоварување, туку и нудат посебен шарм и автентичност. Достапните острови се идеални за семејства и парови кои сакаат да уживаат во помирен одмор далеку од гужвата, а сепак да доживеат врвно искуство. Покрај тоа што нудат поволни цени за сместување, храна и активности, овие острови кријат скриени богатства како недопрени плажи, локални фестивали и прекрасни излети кои го прават одморот незаборавен.

1. Евиа

На Евиа ќе најдете мирни плажи и села што како да се застанати во времето. Можете да се прошетате по калдрмисаните улици, да пробате свежа риба во локалните таверни и да уживате во изгрејсонцето на плажите без големи гужви. Со мостот што го поврзува со копното, пристапот е лесен, а ноќевањето започнува од околу 30 евра за две лица.

2. Тасос

Северниот бисер на Егејското море ве привлекува со бујна природа и кристално чисти води. Можете да истражувате водопади, да прошетате по традиционалните села Панагија и Теологос и потоа да уживате во обилен ручек во некоја од пристапните локални таверни. Патувањето со траект е едноставно, а сместувањето започнува од 38 евра за две лица.

3. Лефкада

Лефкада е островот што можете да го посетите без да плаќате траект. Со бели песочни плажи како Порто Кацики и Егремни, тоа е рај за љубителите на море и сонце. Можете да изнајмите куќичка на плажата за 40 евра или едноставно да го поминете денот на бесплатните плажи, уживајќи во локална храна по пристапни цени.

4. Самос

Историјата и природата на Самос се совршено споени. Од античките локалитети во Питагореион до мирните плажи и пријателските локални таверни, островот е идеален за семејства и патници со помал буџет. Студио за две лица во предсезона може да се најде за околу 38 евра, а кафето на плажа чини само 2 евра.

5. Икарија

Икарија ве примамува со спокојството и долгиот живот на локалците. Можете да прошетате низ селата Арменистис и Агиос Кирикос, да пробате локални сирења и риба и да се опуштите на плажи како Сејшелис или Ливади. Ноќевањето во приватен апартман е околу 40 евра, а многу плажи се бесплатни или со минимална конзумација.

6. Андрос

Андрос е дел од Кикладите, но многу поумерен и автентичен. Песочните плажи и мирните села како Бациа и Гавриа ве повикуваат да уживате без гужва. Локалните кафулиња нудат кафе и пијалаци по поволни цени, а сместувањето започнува од 35 евра за две лица.

7. Лерос

Мал, но прекрасен остров во Додеканезот, Лерос нуди мир и автентичност. Можете да се прошетате низ Агиа Марина и Лаки, да пробате свежа риба или локални специјалитети, а апартманите започнуваат од 40 евра за две лица.

8. Крит (помалку познати делови)

Дури и на Крит може да најдете достапни места. Селата како Палеокора, Ситиа и Матала нудат поевтини апартмани (од 30 евра за две лица), локални таверни со големи порции и бесплатни плажи каде што можете да уживате без да потрошите големи пари.