Јавниот сектор утре стапува во генерален штрајк, сè до исполнување на синдикалното барање за линеарно зголемување на нето-платите по 2.806 денари, што би било законско усогласување со растот на минималната плата што се зголеми токму за тој износ – од 15.194 денари на 18.000. ССМ најавува и дека симболично, утре во 10 часот, пред Собранието ќе постави 120 празни столчиња, а задутре пак, пред Владата 21 столче, со што, како што велат, им порачуваат на пратениците и на претставниците на Владата дека ако не ги претставуваат интересите на работниците, да ги испразнат столчињата.

– Ќе штрајкуваат управата, правосудството, здравството, МВР, јавните и комуналните претпријатија и други, односно сите што ги опфаќа Општиот колективен договор за јавниот сектор. На штрајк се поканети сите од јавниот сектор, кои не го добија покачувањето што им следува, но поканети се и тие на кои се зголемиле платите за поддршка на своите колеги – објасни за „Слободен печат“ Иван Пешевски од ССМ.

Од ССМ велат дека итните случаи и работите што се неопходни за да не се загрози здравјето, животот и личната сигурност на вработените и на граѓаните, ќе ги одржуваат 10 проценти од вработените.

Инаку, во претпладневните часови половина Влада седна на преговарачка маса со претставниците на ССМ. На состанок дојдоа вицепремиерот Фатмир Битиќи, министерот за финансии Фатмир Бесими и министерката за труд и социјална политика Јованка Тренчевска. Пешевски го оценува состанокот како неуспешен.

– Од Владата се обидоа да купат време. Нè убедуваа дека треба да разговараме за одржлив модел, односно за нова методологија за утврдување на платите. Ние немаме толку време. Инфлацијата е голема. Сега мора да делуваме, а потоа може да преговараме и за некаков нов модел за плати – вели Пешевски.

Од ССМ се крајно разочарани што во ребалансот на Буџетот всушност не се споменати пари за зголемување на платите во јавниот сектор и потенцираат дека останува и нивното барање за регрес за годишен одмор во јавниот сектор од 2023 година.

Инаку, завчера на седница на Комисијата за финансирање и буџет не помина амандманот на ССМ предложен преку ВМРО-ДПМНЕ во ребалансот на Буџетот да се обезбедат средства за линеарно покачување на платите.