Успешен тест на кадетите пред настапот на СП
Македонија како генералка пред СП славеше со конечен резултат 32:26 (12:12), но нашите репрезентативци се намачија за да го совладат упорниот противник.
Бевме во постојано водство во текот на целата средба, но таа позитива се движеше од еден до два гола разлика. Дури во последните 10 минути беше скршен отпорот на Чиле кој со својата игра ја „имитираше“ Аргентина, нашиот прв противник на СП.
Сигурно и нашите кадети добро ќе го анализираат мечот и во наредниот период го намалат бројот на грешки во фаза на нападот. Најдобар стрелец на вечерашната средба беше нашиот Серафимов со седум погодоци.
Првата средба на Мундијалот ќе ја играме на 6 август, во ВИП Арена СЦ „Борис Трајковски“ – Скопје, со почеток од 20.30 часот против Аргентина. Во групата Ц се наоѓаат уште репрезентациите на Нигерија, Бахреин, Данска и Јапонија. Првопласираните четири од секоја група ќе одат во осминафиналето. Повеќе информации на официјалниот сајт на Мундијалот.