Унгарскиот премиер Петер Маѓар предложи измена на уставот за да се овозможи смена на претседателот, што би можело да го отвори патот за директни претседателски избори. Маѓар ги објави плановите утрово пред палатата Шандор по разговорите со претседателот Тамаш Шуљок, објави „Еуроњуз“.

„Исто како што Виктор Орбан го разочара унгарскиот народ, така и Тамаш Шуљок, кого го назначи, ја разочара унгарската република. Функцијата претседател на републиката е поважна и помоќна од кој било шеф на држава. Во интерес на Унгарија е институцијата претседател да го врати угледот што беше нарушен во последните години од молчење, неодржливи одлуки и пропусти. Го информирав претседателот дека доколку остане на функцијата и не поднесе доброволна оставка, денес ќе ги известам пратениците од партијата Тиса за неговата одлука и веднаш ќе ги започнеме потребните процедури“, изјави Маѓар.

Премиерот не откри детали за уставната промена што ја подготвува владата, но нагласи дека тоа нема да биде закон „по мерка“ за едно лице, туку рамка што ќе овозможи и смена на други државни лидери.

Маѓар ќе разговара за понатамошните чекори со пратениците од неговата партија Тиса подоцна во текот на денот, иако одлуката можеби нема да се донесе некое време. Премиерот рече дека би сакал граѓаните да имаат поголема улога во изборот на претседателот. Тоа би можело да значи директни претседателски избори, но можни се и други решенија. Тој рече дека деталите сè уште треба да се разработат со пратениците.

Тамаш Шуљок во видеообјава на Фејсбук во неделата изјави дека не е подготвен да се повлече од функцијата претседател и дека сака да продолжи да соработува со владата и да помогне во донесувањето на законите потребни за повлекување на средствата од ЕУ. Тој додаде дека ќе чека на мислењето на Венецијанската комисија за неговиот случај и нагласи дека новата влада мора да дејствува преку уставни средства.

Маѓар одговори со своја објава на Фејсбук.

„Тамаш Шуљок никогаш не се залагал за угнетените, нападнатите или за владеењето на правото. Дури и на Денот на децата, тој само ја брани својата месечна плата од 6,3 милиони форинти, наместо да се извини“, напиша тој.

Партијата на Маѓар предлага закон со кој Орбан никогаш повеќе нема да може да биде премиер