Владејачката унгарска партија Тиса вчера вечерта во парламентот поднесе предлог за уставен амандман со кој премиерскиот мандат би се ограничил на најмногу осум години, што законски би го оневозможило враќањето на поранешниот претседател на владата, Виктор Орбан, на таа функција, пренесува Ројтерс.

Актуелниот премиер Петер Маѓар изјави дека ќе го искористи двотретинското мнозинство во парламентот за да ги поништи и измени законите донесени од партијата Фидес на Орбан, вклучувајќи го и Уставот.

„Целта е да се обнови демократскиот баланс меѓу трите столба на власта“, рече Маѓар.

Според нацрт-амандманот објавен на веб-страницата на парламентот, лицата кои претходно биле на функцијата претседател на владата најмалку осум години „не може повторно да бидат избрани за премиер“. Ова правило би се применувало за сите премиерски мандати по 2 мај 1990 година. Исто така, предлогот предвидува премиерот да мора да отстапи од функцијата по вкупно осум години стаж, односно по два мандата.

Амандманот го подготвува теренот и за укинување на Канцеларијата за заштита на суверенитетот, тело што Орбан го основаше во 2023 година, кое водеше регистар на медиуми кои се сметаа за закана за унгарскиот суверенитет и имаше овластување да ги истражува нивните активности.

Владата на Маѓар, врз основа на овие измени, би можела да ја преземе и контролата врз фондациите кои управуваат со дваесетина универзитети, а се отвора и можност за нивно распуштање. Во тој случај, државниот имот во вредност од повеќе стотици милијарди форинти, кој владата на Орбан им го додели на тие фондации, би се вратил во сопственост на државата.

„Амандманот јасно нагласува дека иако фондациите се приватни ентитети, нивниот имот е државен имот“, се наведува во текстот на законскиот предлог.

Актуелниот премиер Петер Маѓар на изборите во април го собори од власт Виктор Орбан по 16 години владеење, а притоа најави повеќе реформи и антикорупциски мерки, како и одмрзнување на европските фондови.

Кој е Петер Маѓар, човекот што го собори својот детски идол Орбан?