Претставници на угостителите на денешната средба со државниот секретар во Министерството за економија и труд побарале прво да се спроведе кампања, па потоа да се почне со примена на Законот против пушење.

Како што информираше министерот за економија и труд, Бесар Дурмиши, идната недела најверојатно ќе се одржи уште еден состанок, на кој ќе бидат присутни и тој и министерот за здравство, а ќе се разгледаат сите можности.

Дурмиши не кажа дали можеби ќе се одложи спроведувањето на Законот кој треба да почне од 1 март, но напомена дека целта е грижа за јавното здравје.

На претстојниот состанок, нагласи тој, ќе се донесе одлука што ќе биде прифатена од сите засегнати страни, вклучувајќи ги и угостителите.

– Ги слушнавме забелешките на угостителите кои побарале одреден временски период до стапување во сила на Законот, односно да одиме прво со кампања па потоа со информација додека почне примената, за да бидат на некој начин подготвени. Ние ќе им повториме која е целта и на крај ќе донесеме одлука што ќе биде прифатена од сите засегнати страни, вклучувајќи ги и угостителите – изјави Дурмиши, одговорајќи на новинарски прашања по настанот во Владата на кој беше презентиран Законот за работно ангажирање лица.