Три победи на македонските тенисерки за полуфинале во „Били Џин Кинг купот“
Женската тениска репрезентација на Македонија триумфираше во последното трето коло против Јужна Африка со 2:1 и успеа да се пласира во полуфиналето на „Били Џин Кинг купот“.
Во рамките од групата „Ф“ Македонија го освои првото место, пред Јужна Африка, Боцвана и Уганда.
Во првиот дуел во поединечна конкуренција Магдалена Стоилковска во два сета со 6:2 и 6:0 беше совладана од Хајке Јансе Ван Вурен, а потоа нашиот прв рекет Лина Ѓорческа со идентичен резултат триумфираше над Шанел Симондс.
Победникот во овој меч го решаваше играта во двојки каде Ѓорческа и Стоилковска со пресврт стигнаа до победа од 2:1.
Првиот сет им припадна на тенисерките од Јужна Африка, Илајз Хатинг и Шанел Симондс откако славеа со 6:3. Во продолжението нашите тенисерки бодрени од скопската публика двата сета ги решија во своја полза со 6:3 и 6:3 и на Македонија и го донесоа клучниот поен за пласман во полуфиналето.
Нашите најдобри тенисерки в петок (8 јули) против Косово ќе играат за место во финалето и борба за промоција во повисок ранг на натпреварувањето.