Легендарниот мексикански голман Гиљермо „Мемо“ Очоа официјално стави крај на својата богата професионална кариера. Четириесет и едногодишниот чувар на мрежата ја соопшти одлуката преку емотивно видео, упатено до своето семејство и до навивачите.

Со своето последно Светско првенство годинава, Очоа четврти пат настапи на Мундијал, но беше повикан во репрезентацијата на Мексико на дури шест светски шампионати. Со тоа се приклучи на ексклузивното друштво заедно со Кристијано Роналдо и Лионел Меси како единствени фудбалери кои биле дел од шест мундијалски селекции.

Најголемите успеси ги доживеа токму во дресот на мексиканската репрезентација.

„Еден дрес секогаш беше поразличен. Тој претставуваше цела една нација“, вели Очоа во видеото.

„Секојпат кога го облекував дресот на Мексико, во моите раце беше сонот на милиони Мексиканци. На оние кои не можеа да бидат на стадион, но натпреварот го следеа пред телевизорот со своето семејство. На навивачите кои го изгубија гласот пеејќи ја ‘Cielito Lindo’. И на оние кои тивко се молеа пред секој пенал.

Не можам да ја разберам мојата репрезентативна кариера без да сфатам колку голема беше таа одговорност.“

Еден од најнезаборавните моменти во неговата кариера беше натпреварот против домаќинот Бразил на Светското првенство во 2014 година, кога со шест фантастични интервенции му помогна на Мексико да избори реми 0-0.

Осум години подоцна, на Светското првенство во 2022 година, Очоа го одбрани пеналот на Роберт Левандовски и стана првиот мексикански голман кој одбранил пенал на натпревар од Светско првенство.

Nunca imaginé hasta dónde podía llevarme un sueño.

Hoy solo puedo mirar atrás con orgullo y decir: GRACIAS

Gracias a mi familia. Gracias a mis compañeros. Gracias a cada aficionado que estuvo presente en cada etapa del camino.

Me llevo el cariño de millones y la tranquilidad… pic.twitter.com/TY2DaflSBd

— Guillermo Ochoa (@yosoy8a) July 21, 2026

Со репрезентацијата освои шест титули во Голд купот на КОНКАКАФ, а беше дел и од селекцијата што ја освои Лигата на нации на КОНКАКАФ во сезоната 2024/25.

Очоа е производ на младинската школа на Клуб Америка. По успешните настапи во Франција, Шпанија и Белгија, во 2019 година се врати во матичниот клуб, а неговото доаѓање предизвика вистинска еуфорија – илјадници навивачи го пречекаа на аеродромот во Мексико Сити.

Последниот настап на Светското првенство во 2026 година беше симболичен. Очоа влезе во игра во финишот од последниот натпревар на Мексико во групната фаза, кога селекторот Хавиер Агире го замени првиот голман Раул „Тала“ Ранхел за да му овозможи на легендарниот чувар на мрежата да добие стоечки овации на преполнетата „Ацтека“.

📆 𝗧𝗛𝗥𝗢𝗪𝗕𝗔𝗖𝗞: When Guillermo Ochoa dropped a masterclass against Brazil at the 2014 World Cup. 🧤🇲🇽pic.twitter.com/rvwoQcDvuQ https://t.co/Q3Zdz8tbd9

— Football Tweet ⚽ (@Footballtweet) July 22, 2026

Токму на стадионот каде што започна неговата блескава кариера, Гиљермо Очоа ја затвори својата фудбалска приказна, испратен со огромен аплауз од мексиканските навивачи и љубителите на фудбалот ширум светот, кои со години уживаа во настапите на легендарниот „Мемо“ на светските првенства.

По шест Светски првенства, Роналдо ќе го одигра последниот натпревар во дресот на Португалија