Традиционална крводарителска акција по повод 26 Јули “ЗА СКОПЈЕ СО ЉУБОВ, ДАРУВАЈ КРВ- БИДИ ХУМАН ! ”
Црвен крст на град Скопје, со поддршка на Општинска организација на Црвен крст Кисела Вода и во соработка со Институтот за Трансфузиона медицина традиционално, на 26 Јули ќе организира крводарителска акција во знак на сеќавање на катастрофалниот земјотрес во Скопје, но и во знак на покажаната солидарноста и хуманоста на нашите сограѓани.
Крводарителската акција ќе се одвива на 26 Јули во периодот од 09:00-17:00 часот во Дневниот центар за дарување крв на Црвен крст на град Скопје кој се наоѓа во ДХО Даре Џамбаз.
Станува збор за крводарителска акција која е веќе препознатлива и е посетена од голем број граѓани.
Од Црвениот крст велат дека со оваа акција, се придонесува кон долгорочната цел на организацијата- непречено снабдување со крв и крвни продукти, како и придонес во промоција и унапредување на крводарителството на територија на град Скопје.