Четиринаесетгодишно момче е обвинето за тероризам под сомнение за планирање напади врз две лондонски џамии. Тинејџерот, кој беше приведен минатиот четврток (9 јули), во јужен Лондон, првично беше уапсен под сомнение за оштетување на возило, но по претресот, полицијата пронајде „голем број загрижувачки документи“. Затоа беше повторно уапсен според Законот за тероризам под сомнение за врски со крајно десничарски тероризам, пишува „Скај њуз“.

Момчето, чиј идентитет не може да се открие поради неговата возраст, сега е обвинето за планирање терористички напади во областа Сатон во јужен Лондон. Тој е обвинет и за кривично дело оштетување на имот кое било „расно мотивирано“. Полицијата објави дека обвинението за тероризам се однесува на план за напад врз две џамии во областа Сатон.

„Полицијата контактирала со џамиите, а специјализирани службеници им даваат постојани совети и поддршка. Исто така, сме во контакт со жртвата чие возило е оштетено“, се наведува во соопштението за медиумите.

Портпаролот на полицијата додаде дека не се верува дека постои трајна или поширока закана поврзана со овој случај и дека не се бараат други лица како дел од истрагата.

„Загрижувачки е да се види некој толку млад обвинет за вакви злосторства“

„Ова е многу сериозно обвинение за тероризам против младо момче и веројатно ќе биде од голема загриженост за јавноста и локалната заедница“, рече Хелен Фланаган, шефица за борба против тероризмот во Лондон. Знаеме дека ова ќе биде од особена загриженост за муслиманската заедница. Тесно соработуваме со засегнатите установи за да се осигураме дека тие ги добиваат сите информации и совети, поддршка и уверување што им се потребни, и ќе продолжиме да го правиме тоа“, рече Фланаган.

„Иако е длабоко загрижувачки да се види дека некој толку млад е обвинет за вакви злосторства, за жал во нашите случаи гледаме зголемен број деца и млади луѓе“, додаде таа.

Малолетникот е приведен во притвор и утре треба да се појави пред Судот за прекршоци во Вестминстер.

Хаос на Лондонскиот аеродром — авион ја блокирал пистата, девет други прогласија итна состојба