Британската нискобуџетна авиокомпанија „Изиџет“ објави остар пад на заработката во вториот квартал од годинава, објаснувајќи го со зголемените трошоци за гориво и послабите резервации поради војната на САД и Израел против Иран, пренесува „Гардијан“.

Во периодот од април до јуни, профитот пред оданочување изнесувал 85 милиони фунти (99,63 милиони евра) и бил за околу 70 проценти понизок отколку во истиот период лани.

Приходите на ниво на групацијата се зголемиле за два проценти на 2,98 милијарди фунти. Бројот на патници останал на нивото од минатата пролет, со превезени 25,8 милиони патници и полоша стапка на исполнетост.

Менаџментот им го припиша остриот пад на профитот на зголемените трошоци за гориво поврзани со конфликтот на Блискиот Исток, што доведе до пораст на цените на енергијата. Во такви околности, трошоците за гориво на „Изиџет“ се зголемиле за 105 милиони фунти.

„И во периодот од април до јуни, се обидовме да ги управуваме последиците од конфликтот на Блискиот Исток и неговото влијание врз цените на горивата и трендовите на резервации“, вели извршниот директор на компанијата, Кентон Џарвис. Цените на билетите, според него, биле привлечни, поттикнувајќи силна побарувачка за резервации во последен момент за летовите и пакетите за одмор на „Изиџет“.