Поранешниот директор на Државниот пазарен инспекторат, Горан Трајковски, кој беше и кандидат за градоначалник на Кисела Вода од редовите на СДСМ на последните локални избори, го проширува бизнисот и влегува во градежништвото, а веќе основал и компанија регистрирана за изградба на згради, пишува „Фактор“.

Семејниот бизнис на Трајковски досега беше увоз и дистрибуција на вилушкари од брендот „Стил“ преку фирмата „Штраус компани“. Но, поранешниот функционер од јуни е основач и на „Вентора холдинг“, фирма со дејност „изградба на згради“. Тој за „Фактор“ сепак вели дека не му е намерата да влегува во бизнисот со изградба на станови, туку на „објекти во кои ќе се остваруваат комерцијални активности“.

– Тоа е фирма со која прво ќе започнеме да градиме нов објект за сопствени потреби, а за понатаму ќе видиме какви ќе бидат амбициите, бидејќи кога се работи со недвижнини треба да се биде внимателен во калкулациите и да се чека трпеливо прав момент. Ако се оди во добар правец, понатаму би се занимавале со изградба на деловни објекти и конструкции, вели Трајковски.

Тој беше назначен за директор на Државниот пазарен инспекторат во декември 2022 година, а беше разрешен неполни две години подоцна, кога се смени власта.