Американските берзи стагнираат бидејќи растечките цени на нафтата ги зголемуваат стравувањата од нова инфлација и евентуално зголемување на каматните стапки од страна на Федералните резерви. Американската берза вчера беше речиси непроменета, бидејќи инвеститорите се обидуваа да го проценат влијанието на растечките цени на нафтата и новите деловни резултати од големите компании, пишува Ројтерс.

Поширокиот пазарен индекс S&P 500 го заврши денот речиси непроменет, додека технолошкиот индекс Nasdaq Composite ослабе за околу 0,3 проценти. Индустрискиот индекс Dow Jones регистрираше мало зголемување од околу 35 поени, или 0,1 процент. Главна причина за претпазливост на пазарот беше новиот скок на цените на енергијата, особено на нафтата. Фјучерсите за сурова нафта брент пораснаа за околу три проценти, достигнувајќи над 94 долари за барел, додека во еден момент накратко ја премина границата од 95 долари.

Во исто време, цената на американската нафта од Западен Тексас (WTI) порасна за приближно три проценти и се тргуваше над 86 долари за барел. Растот на цените на нафтата дополнително ја зголеми загриженоста на инвеститорите за можен нов бран на инфлација. Растот на цените на енергијата беше под влијание и на напнатата ситуација на Блискиот Исток по новите напади на САД врз Иран.

Државниот секретар на САД, Марко Рубио, изјави дека, според него, Иран „не е сериозен во врска со преговорите“.

-Ако се сериозни, и ние сме сериозни. Ако не се, ќе направиме што е потребно за да ги заштитиме нашите интереси и интересите на нашите сојузници – рече Рубио.

Инвеститорите се плашат од новите потези на Федералните резерви. Пазарите сега внимателно го следат движењето на цените на нафтата, бидејќи поскапиот енергенс може дополнително да ги зголеми трошоците за потрошувачите и компаниите. Ако инфлацијата остане висока, Федералните резерви (ФЕД) би можеле да ги одржат каматните стапки високи или дури и да размислат за нивно зголемување.

Трговците со фјучерси на федералните фондови сега проценуваат дека има околу 31 процент шанса ФЕД да може да ги зголеми каматните стапки уште овој месец. Ова е значително зголемување во споредба со претходната недела, кога таа веројатност беше само 10 проценти. Во исто време, пазарите проценуваат дека постои околу 75 проценти веројатност за зголемување на каматните стапки од најмалку четвртина процентен поен во септември, според алатката FedWatch на CME.

Инвеститорите ќе продолжат да следат три клучни фактори во наредните денови: движењата на цените на нафтата, новите деловни резултати од компаниите и сигналите од Федералните резерви за идната монетарна политика.

Силен пад на инфлацијата во САД: Дали Федералните резерви ја менуваат политиката?