Данскиот возач Кевин Магнусен ги шокираше сите во Бразил, откако постигна најдобро време во квалификациите за спринтерската трка и ја освои првата пол-позиција во кариерата.

Доколку мислевте дека одбраната на титулата на Макс Ферстапен е крај на возбудувањата во Формула 1 за 2022 година, сте се излажале. Остануваат уште две трки до крајот на сезоната, а очигледно многу возачи сакаат да докажат дека имаат што да покажат во оваа година.

Овој пат, од никаде, се појави Магнусен, Данецот во Хас е веројатно последната личност на која би се обложил за да стигне до пол-позицијата. Особено што неговиот соиграч Мик Шумахер го зазеде последното место. Во богатата Ф1 историја ретко се случувало двајца возачи од ист тим да бидат на првата и последната позиција во квалификациите, без некои казни или дефекти.

Во секој случај, Магнусен постигна најбрзо време во третата квалификациска сесија на дожд од 1:11.674, 203 илјадити делови од секундата побрзо од Ферстапен. Вториот стартен ред е резервиран за Британецот Џорџ Расел во Мерцедес и Ландо Норис во Мекларен.

Спринт трката во Бразил е на програмата во сабота од 20.30 часот, а главната трка во недела од 19.00 часот.